Qazi anasıyam dedim Kəbirə Məmmədova isə “olda qazi anası, şəhid anaları ayağımın altına düşür sən kimsən ki dedi”
bakuxeber.az
2 min read
Binə Ticarət Mərkəzində baş verən son hadisə ictimaiyyətdə böyük rezonans doğurub. Məlumata görə, ticarət mərkəzinin rəhbəri Kəbirə Məmmədova qazi Ramil Kamilovun anası Səidə Kamilovanın yeganə dolanışıq yeri olan icarə yerindən müddət verilmədən çıxarılmasına qərar verib. Bu hadisə qazi ailəsinə qarşı böyük haqsızlıq kimi qiymətləndirilir.
Məlumatlara görə, Kəbirə Məmmədovanın göndərdiyi şəxslər zorakılıq edərək Səidə Kamilovanın mallarını çölə töküblər. Qazi anasının mallarının bir hissəsi oğurlanıb, üstəlik, o, 20 min manatdan çox borcun altında qalıb. Hadisə zamanı Səidə Kamilovanın etirazına cavab olaraq Kəbirə Məmmədova sərt və alçaldıcı ifadələr işlədib: “Olda qazi anası, şəhid anaları mənim ayağımın altına düşür, sən kimsən ki?”
Bu ifadə qazi anasını daha da sarsıdıb. O, bildirir ki, onun oğlu Vətən müharibəsində ağır yaralanaraq böyrəyini itirib və ailənin yeganə gəlir mənbəyi məhz bu ticarət yeri olub. Qazi anası min bir əziyyətlə ailəsini dolandırdığı iş yerinin əlindən alınmasını böyük ədalətsizlik hesab edir.
Səidə Kamilova Birinci vitse-prezident Mehriban Əliyevaya müraciət edərək baş verən haqsızlığa son qoyulmasını istəyib. O, bazar rəhbərinin qazi və şəhid analarına qarşı səsləndirdiyi təhqiramiz ifadələrin cavabsız qalmamasını tələb edir.
Bu hadisə cəmiyyətin diqqətini qazilərin və onların ailələrinin üzləşdiyi çətinliklərə yönəldib. İctimaiyyət bu cür haqsızlıqlara qarşı tədbir görülməsini və müvafiq qurumların məsələyə müdaxilə etməsini tələb edir. Qazilərə və onların ailələrinə layiq olduqları hörmət və qayğının göstərilməsi vacibdir.
